MY SCHOOL TEACHER.
That day when Grace rush her mama wey
armed robbers shoot on her way from
Lagos where she for go do Ormugor, go
hospital, Grace don already give up say
her mama don die.
This na woman wey her husband die
leave 8 children give make she train.
Na with her teaching job salary and
money wey she dey make from the small
provision store wey she get for front of
her house nai she dey put together take
dey train her 8 children.
Being a teacher, na so she stand make
sure say all her children go school
graduate since to her, na western
education nai go be the best thing she fit
give her children.
As God dey do e work , na so God help
her carry the load till all her pikin finish
befor government cum pension her. Na
the pension she dey use dey hold her
side with her small store till God go bless
her children with excess money to build
house for her make she comot for
rentage.
Na the last born wey marry 2 years ago
nai born for Lagos wey make her travel.
But when dem dey Oghara here on their
way back from Lagos where she for go
do 1 month ormugor, nai robbers waylay
dem begin shoot anyhow as the driver
wan form Anini.
Na the vex eye say the robbers nor see
better money obtain from their motor nai
be shoot wey dey begin shoot dem wey
nor get bar. Dem nor fit reason the grey
hair wey dey Mama Grace head, dem just
sink two bullets for her lap.
Pufffff!
Pufffff!!
The robbers spend almost 15 minutes
dey act film for the road that krokro
evening befor dem finally snatch one
jeep take lofair.
News don fly as pipo rush those wey
dem shoot go Sapele Central hospital.
When Grace see how doctors dey do sme
sme for Central hospital, nai she rush her
mama go one private clinic for Sapele too.
Na when she reach the clinic nai the
doctor for take e time handle her case
well.
The doctor cum tell Grace say make she
deposit 30k befor dem go start the
surgery to remove the bullets from her
mama body.
She cum rush go house go tell her
husband who rush go withdraw 40k with
e ATM card give her.
When she finally reach the clinic after
almost one hour, the doctor cum tell her
say dem don finish the surgery.
Make she wait for sometime.
Na so she sidon near her aged mama. She
don already call her other brothers and
sisters.
When day break, everywhere don full
with Grace sisters, brothers, friends and
well wishers.
Everybody dey wish her get well soon.
For the one week wey mama Grace stay
the hospital, the hospital management
norva collect one naira from dem.
That morning wey Grace senior brother
cum go meet the doctor say dem wan
discharge their mama, since their mama
don dey talk well now, the doctor cum
say make dem wait till 12.
At exactly 12 nai Grace with her senior
brother go meet the doctor again to
know how much to pay for their total bill.
Dem don already task demselves
different amount.
Na almost 150k dey with dem for pocket.
The doctor cum carry two bagco super
sack put for table nai e say make dem
take am.
Say, the woman so, their mama, na e class
teacher for Ethiope primary school.
Say na she be one of the teachers wey
build her wey God cum make am become
a doctor so.
Inside the two bags na big bournvita, big
peak milk, one loaf of Lucky bread, 12
tins of titus sardine, 2 packets of Lipton,
one bottle of Eva wine, 2 packets of
carbin biscuits, and one envelop wey
contain 20k.
Na so tears of unbelief just dey roll down
from Grace with her senior brother eyes.
Nor be small thank dem thank the doctor.
When dem tell their mama wetin the
doctor do, she cum say make dem call am
come.
The doctor try to describe himself but the
old woman nor fit remember. The only
thing she just talk be say
"My pikin, dress come."
The doctor dress near her nai she hold
the doctor hand use am touch her head
say
"You go grow old my child.
This reward wey you give me becos I
hold chalk, na so you go get reward
becos you hold stetoscope."
The doctor come say Amen.
As dem carry her tetete enter Grace Space
bus, na so the doctor stand dey watch
dem.
As the motor dey drive dey go, naim be
tears wey fall from e eyes as e say
"God, bless my teacher.
Amen."
My pipo, teachers dey mould us.
If you be teacher for this forum, I pray
make you get your reward for this life.
Amen.
And if you be somebody wey go through
school, always be nice to teachers.
In one way or the other, we get one
particular teacher wey mean the whole
world to us.
Close your eyes and pray for am.
Even if that teacher don die, call e name
and pray for am.
May God bless all our teachers.
Amen.
I dey cum make I go wash Aunty Eunice Pants wey
teach me for Urhiapele primary school. Lol

Wow.....Teachers are d builders of tomorrow's leaders....