Ameobi don score im fess gol



Andrew Randa


Shola Ameobi don celebrate d call wey Keshi call am inside d list wey im rilis for d players wey go nack head win shirt for Supa Eagle for d 2013 Afrika Cup of Nation, as im score d gol wey make Newcastle win dier game 1-0 agains Queens Park Rangers for d Barclay Premier Lig for Satuday.

D strika, wey b d numba 3 for line for players wey dey attack for im klub Newcastle afta Demba Ba and Papiss Demba Cisse, bin enta field for 61 minut wen dem comot Cisse, come score d winning gol 10 minut before match finish.

D big strika show korrect tapping, as im score ogbonge goal wit im left leg wey QPR kipa Robert Green bin no get ansa to, from d cross wey Italo defenda Davide Santon gif am.

Na onli 11 time Ameobi don play dis seasin so and d gol wey im score na d fess wey im score dis seasin so.

Ameobi show sef go make National Tim coachee Stephen Keshi jolly as per im put d player name for d list wey im rilis for the Nation Cup wey dem go go play next year for South Afrika.

Na onli one match Shola Ameobi don play for Naija, and na for d friendly match wey Supa Eagle waya Venezuela for Novermber 15.

http://ng.supersport.mobi/football/nigeria-naija/news/121222/Ameobi_don_score_im_fess_gol



© supersport.com