Magnus Abe Na Our Lionel Messi For Guber 2019 - Rivers APC leaders

Big Big APC Oga dem been gather yesterday for Pitakwa (Portharcourt) for one ogbonge waka wey dem call #TheMeeting. APC party people from every corner for Rivers state and delegate wey dem invite been come fully to put head together base on how dem wan make 2019 Rivers Governorship election be, Even sef , Lawmakers wey dey represent people for state and for Abuja, before before Commissioners, Special Advisers, Local Government Chairmen and plenty plenty people wey get say for Rivers state politics matter as dem put ear for ground , hear as things dey go on for the party from 23 LGA wey dey the state.

The people for #TheMeeting still come agree oh say make the APC for the state make dem dey on dia own, make dem no allow any body push dem around, make dem allow anybody wey get ambition make e come out, base on dis dem take time call our Senator Magnus Abe, make him come contest as Governor for 2019, say Magnus na d only person dem believe say go fit do d right thing for Rivers state.

Hear d gist …

One Ogbonge Oga for Rivers state wey be Senator Wilson Ake, follow talk say

People wey follow Magnus Abe na people wey don decide to follow truth, say for 2015, we go pitch, come bench our own lionel messi, we come loose, dis time again for 2019 we don get another match, and the coach dey yarn say we go bench lionel messi again, we go gree that kain coach ? e no dey possible to bench messi for match wey you wan win, Magnus Abe be our Lionel Messi and we go support am , say e no be crime to support magnus and anybody wey say na crime no sabi wetin him dey yarn.

Another Oga wey be Lawmaker for National Assembly still chook mouth join wetin other people dey yarn say Him dey speak on behalf of every body wey dey for National Assembly , say nobody fit kill Magnus Abe ambition,say make nobody deceive anybody.



Oga Allwell Onyesor follow talk say

Magnus Abe na capable politician wey dey sabi wetin dey for dis 21st century, we dey call am make him come run as governor, say time to waste no dey again

#TheMeeting still come yarn say dem dey tell God thank you base on how him take keep Oga Presidoo as him return from him medical trip as dem agree to dey loyal to the party and the country as we go celebrate our 57 independence anniversary.

Source: http://newsinpidgin.ng/group-ginger-magnus-to-run-for-governor/