Wait oo Guy but why you no like to watch football.
You see this question eh I don hear am tire.
No be say I no like football ooo but my gain for there no
reach my loss.

Me I be that kin person wey like to put my heart for
everything wey I dey do, na so I dey carry all my mind body
and soul dey use watch ball, if dey win my team na so my
BP go rise and my heart go dey pain me like mad,I no go
come and kill my self for something wey I no dey collect
shishi.

But na one ogbonge drama wey make me bone football
kpatakpata, it happen on the night of June 25 2014 and na
for Chelsea Man U match, for the viewing center my voice
dey raise like tomorrow no dey ,we dey knack Chelsea 2 0
and my body dey totori me anyhow.Happy me dey form one
mock song after another for poor Chelsea fans .
Few minutes to end of match na im the yeye generator trip
off.

Everywhere dey pitch black.Na im I hear KPOWAI for my
head. ISIM OO( MY HEAD) na the only thing we comot for
my mouth. Guys this knock I dey yarn una so dey heavy. The
knock carry anger, hate and frustration and the pain no be
here.
My head was doing boom boom like say i wan fall and I dey
draw the vein wey dey my left eye.
Na so they bring back the light and I look back to know who
gave me that knock, na so all the Chelsea guys wey dey my
back Pam like gentlemen.
Na who I go accuse?.
Accuse the wrong person na fight
Accuse the right person na fight too because I no get
evidence and how I go come collect knock and beating on
the same day,God forbid.

Na so I arrange myself and dey my dey till the match finish.
I come dey wonder, the person wey get mind give dis kin
knock for ordinary football,shey him no go put something for
my drink if I get chance?
My brodas na dat day ooo I hate anything football ooo
That knock na factory reset wey format every atom of
football wey dey my brain

cc honeric01 , semid4lyfe
cc Lalasticlala
cc seun