By Izunna Okafor

Ọchịchị steeti Anambra ekwuola na ọ ga-abàgide n'ịrụnyekwu ọtụtụ ụzọ n'Awka bụ n'isi obodo steeti ahụ iji mee ka mmä ya pụtawanyekwuo ihè.
Nke a bụ nke e mere ka a mara sịte n'ọnụ kọmishọna steeti ahụ na-ahụ maka ịrụ okporo ụzọ, idozigharị ya na ịchọ ya mma, bụ maazị Marcel Ifejiọfọ, n'okwu ọ gwara ndị nta akụkọ n'ụlọ ọrụ ya dị n'Awka. O kwupụtara na ọchịchị Obianọ emepụtala ọtụtụ ihe dị iche iche na ngalaba niile nke steeti ahụ, rụọ ọtụtụ okporo ụzọ n'ebe dị iche iche, ma ka rụrụ na-aga n'ihu, kemgbe ahọ anọ gara aga, iji hụ na Anambra bụ e ji ama atụ n'ihe gbasaara ezi okporo ụzọ.
N'ebe o metụtara isi obodo steeti ahụ bụ Awka, maazị Ifejiọfọ mere ka a mara na ya bụ gọvanọ nwere mmasị pụrụ iche n'ịkwalite ma mee ka ọ kawanye mma, ọ bụnadị dịka ọ wepụtagoro atụmatụ nwogharị bụ ịgbà maka ya bụ isi obodo. O kwuru na a ga-arụnye àkwà n'ebe Regina Ceali nakwa mpaghara Esther Obiakọ iji wee belata ihe mberede okporo ụzọ na-emekarị n'ebe ndị ahụ, bụkwa nke tagoro isi ọtụtụ ụmụ mmadụ.
N'okwu dịkwa ka ibè ya, ọ sị na na ndị niile ji ọrụ ngô n'okporo ụzọ dị iche iche na steeti ahụ na-arụ ya nke ọma na otu a tụrụ anya, dịka e siri chọpụta site n'ịga letagasị otu ọrụ si aga n'ebe ndị ahụ. O mekwara ka a mara na ndị ọrụ otu "Anambra State Road Maintenance Agency" (ARMA) nọkwa gidigbaa ma dị njikere ịhụ na o nweghị ebe ọbụla e nwere mkpọpu ma ọ bụ olùlù n'okporo ụzọ ọbụla, ma sịkwa na oge adịghị anya, na a ga-ebinye ndị ụlọ ọrụ ahụ ngwa ọrụ na akụrụngwa ndị ọzọ goteere ha.
Na nchịkọta okwu ya, ya kọmishọna kwuru na mgbe adịghị anya, na ọchịchị steeti ahụ ga-amalite ịrụ ụzọ dịgasị n'ime ime obodo, iji wee kwalite ọrụ ugbo na ezi ọnọdụ obibi ndụ ụmụ mmadụ npgasị na mpaghara ahụ.